दीक्षितको राष्ट्रिय सम्मानका साथ अन्त्येष्टि

काठमाडौं । वरिष्ठ साहित्यकार स्व मदनमणि दीक्षितको पशुपति आर्यघाटमा आज(विहीबार) अपराह्न राष्ट्रिय सम्मानका साथ अन्त्येष्टि गरिएको छ ।

नेपाल प्रहरीको एक टुकडीले उनलाई राष्ट्रिय सम्मान दिएको थियो । स्व दीक्षितलाई उनका छोरा विनोदले दागबत्ती दिएका थिए ।

उनीप्रति श्रद्धाञ्जलि दिन परराष्ट्रमन्त्री प्रदीपकुमार ज्ञवाली, संस्कृति, पर्यटन तथा नागरिक उड्डयनमन्त्री योगेशकुमार भट्टराई, नेपाल कम्युनिष्ट पार्टी (नेकपा)का वरिष्ठ नेता माधवकुमार नेपाल, महासचिव विष्णुप्रसाद पौडेल, नेता वामदेव गौतम, नेपाल प्रज्ञा– प्रतिष्ठानका कुलपति गङ्गाप्रसाद उप्रेतीलगायत आर्यघाट पुगेका थिए ।

यसअघि उनको शव श्रद्धाञ्जलिका लागि उनकै निवास कालिकास्थानमा राखिएको थियो । निवासमा श्रद्धाञ्जली व्यक्त गर्न उपप्रधानमन्त्री ईश्वर पोखरेल, शिक्षा, विज्ञान तथा प्रविधिमन्त्री गिरिराजमणि पोखरेल, नेपाल काङ्ग्रेसका सभापति शेरवहादुर देउवा, वरिष्ठ नेता रामचन्द्र पौडेललगायत पुगेका थिए ।

निमोनियाका कारण गत साता ललितपुरको सुमेरु अस्पतालमा भर्ना भएका दीक्षितलाई बुधबार ‘डिस्चार्च’ गरी निवास कालिकास्थान ल्याइएको थियो ।

निवासमा शौचालय जाँदा बेहोश भएका ९७ वर्षीय दीक्षितलाई कमलपोखरीस्थित हिमाल अस्पताल लगेपछि चिकित्सकले मृत घोषणा गरेका थिए । उनलाई मुटु, मिर्गौला र श्वासप्रश्वाससम्बन्धी समस्या थियो ।

दीक्षितका ‘माधवी’, ‘ऋग्वेद : केही प्रमुख सुक्त’, ‘ग्यास च्याम्बरको मृत्यु’ लगायत ४६ कृति छन् । नेपाल प्रज्ञा–प्रतिष्ठानका पूर्वउपकुलपति उनले मदन पुरस्कार, साझा पुरस्कार, पद्मश्री पुरस्कारलगायत विभिन्न पुरस्कार र सम्मान प्राप्त गरेका थिए ।

नेपाली पत्रकारिता क्षेत्रमा पनि उनको विशिष्ट योगदान छ । उनले ‘समीक्षा’, ‘आजकाल’लगायत साप्ताहिक पत्रिका सम्पादन गरेका थिए । उनको जन्म १९७९ फागुन ६ गते काठमाडौँको गैरीधारामा भएको राससले समाचार लेखेको छ ।

यता, दीक्षितको निधनमा प्रधानमन्त्री लगायत नेताहरुले दुःख व्यक्त गरेका छन् । प्रधानमन्त्री केपी शर्मा ओलीले वरिष्ठ साधन, प्राच्य साहित्य दर्शनका ज्ञाता मदनमणि दीक्षितको निधनको खबरले मर्माहत भएको उल्लेख गरेका छन् ।

ट्वीट गर्दै प्रधानमन्त्री ओलीले भनेका छन्, ‘नेपाली वाङ्मय क्षेत्रले उहाँको योगदानलाई सदा स्मरण गर्नेछ ।’

सञ्चार तथा सूचना प्रविधिमन्त्री एवं सरकारका प्रवक्ता गोकुलप्रसाद बास्कोटाले पनि साहित्यकार दीक्षितको निधनमा दुःख प्रकट गरेका छन् । ट्वीट गर्दै उनले भनेका छन्, ‘नेपाली वाङ्मय क्षेत्रले उहाँको योगदानलाई सदा स्मरण गर्नेछ ।’

राप्रपा अध्यक्ष कमल थापाले वरिष्ठ पत्रकाररसाहित्यकार दीक्षितको निधनको समाचार सुन्दा अत्यन्त दुःख लागेको जनाएका छन् ।

ट्वीट गर्दै उनले भनेका छन्, ‘उहाँ इमानदार, राष्ट्रभक्त र स्वाभिमानी पत्रकार हुनुहुन्थ्यो । नेपाली वाङ्मयको श्रीवृद्धिमा स्व. दीक्षितको ठूलो योगदान छ ।’

टिप्पणी थप्नुहोस्