नेपालको संविधान दोस्रो संशोधन विधेयक संसदमा पेश

काठमाडौं । संसदमा नेपालको संविधान दोस्रो संशोधन विधेयक पेश गरिएको छ । आइतबारको बसेको संसद बैठकमा कानुनमन्त्री डा.शिवमाया तुम्बाहाङ्फेले संविधान संशोधन प्रस्ताव पेश गरेकी हुन् ।

प्रतिनिधिसभाको आइतबारको बैठकमा संविधान संशोधन विधेयक पेस गर्न अनुमति माग्ने प्रस्ताव निर्विरोध पारित भएपछि मन्त्री तुम्बाहाङ्फेले संविधान संशोधन विधेयक पेश गरेकी हुन् । कुनै पनि सांसदले उक्त प्रस्तावमा विरोधको सूचना राखेनन् ।

संविधानको अनुसूची ३ मा रहेको नेपालको निशान छापमा उल्लेख भएको नक्शा नेपालको परिमार्जित वास्तविक नक्शाअनुरुप बनाउनुपर्ने भएकाले संविधान संशोधन विधेयक ल्याएको मन्त्री तुम्बाहाङ्फेले संसदलाई जानकारी दिइन् ।

लिम्पियाधुरा, कालापानी र लिपुलेक लगायतका भूभाग समेटिएको नेपालको अध्यावधिक नक्शा अनुसूची ३ मा उल्लेख गरिएको निशान छापमा राख्नुपर्ने भएकाले संविधान संशोधन गर्न लागिएको हो ।

संविधान संशोधन विधेयक यही जेठ ९ गते ३ बजे संसद सचिवालयमा दर्ता गरिएको थियो । त्यसअघि मन्त्रिपरिषद बैठकले ५ जेठमा लिम्पियाधुरा, कालापानी, लिपुलेक लगायतका भूभाग समेटिएको नयाँ नक्शा पारित गरेको थियो ।

जेठ १४ गते नै संसद बैठकको कार्यसूचीमा संविधान संशोधन प्रस्ताव पेश गर्ने उल्लेख भएपनि पछि हटाइएको थियो । संविधान संशोधन प्रस्तावमा राजपा बाहेकका अरु दलले समर्थन गर्ने भएका छन् ।

प्रमुख प्रतिपक्षी कांग्रेसले शनिबार केन्द्रीय समितिबाटै निर्णय गरी संशोधन प्रस्तावमा समर्थन गर्ने निर्णय गरेको छ । समाजवादी पार्टी, राप्रपालगायत दलले पनि संशोधनको पक्षमा मतदान गर्ने जनाएका छन् ।

२०७२ असोज ३ गते जारी भएको नेपालको संविधानको पहिलो संशोधन २०७२ सालकै असोज १० गते भएको थियो ।

टिप्पणी थप्नुहोस्

सामाजिक संजाल

पछिल्लो सामग्री