मालीमा सैनिक विद्रोह: राष्ट्रपति र प्रधानमन्त्री नियन्त्रणमा

एजेन्सी । संयुक्त राष्ट्रंघीय महासचिव एन्टोनियो गुटर्रेसले मालीका राष्ट्रपति इब्राहिम बौबाकर केयटालाई तुरुन्त रिहा गर्न आग्रह गरेका छन ।

उनलाई मालीको सेनाले नियन्त्रणमा राखेको बताएको छ । उनले भने सो नियन्त्रणबाटै आफूले आफ्नो पदबाट राजीनामा दिएको घोषणा गरेका छन् ।

सेनाको नियन्त्रणमा राखिएका उनलाई जतिसक्दो चाँडो र विना शर्त मुक्त गर्न महासचिव गुटर्रेसले माग गर्नुभएको महासचिव गुटर्रेसका प्रवक्ता स्टेफान डुजारिकले जारी गरेको विज्ञप्तिमा उल्लेख छ ।

महासचिव गुटर्रेसले मालीको सेनाले उठाएको कदम पनि संविधान विपरीत भएको बताएका छन् । सो विज्ञप्तिमा मालीको सेनालाई यस्तो गैर संवैधानिक कदमलाई तुरुन्त फिर्ता गर्न र त्यहाँका राष्ट्रपतिलाई सेनाको नियन्त्रणबाट मुक्त गर्न भनिएको छ ।

उता राष्ट्रपति इब्राहिम बौबाकरले भने मुलुकमा रक्तपात हुन नदिनका लागि आफूले राजीनामा दिएको बताएका छन् । अल जजिराद्वारा प्रेषित समाचारमा सो कुरा उल्लेख गरिएको छ ।

महासचिव गुटर्रेसले राष्ट्रपति सँगसगै सैन्य नियन्त्रणमा पर्नु भएका मालीका प्रधानमन्त्री बौबौ किसलाई पनि विनासर्त मुक्त गर्न माग गरेका छन् । अन्य क्षेत्रीय तथा अन्तर्राष्ट्रिय संगठन र केही देशले पनि मालीमा भएको सैन्य विद्रोहप्रति चिन्ता व्यक्त गर्दै संवैधानिक व्यवस्थाको पुनर्बहालीका लागि आग्रह गरेका छन् ।

त्यहाँको पछिल्लो अवस्थाको बारेमा भने कुनै समाचार आएको छैन । सेनाले अहिले पनि त्यहाँका नेताहरुलाई आफ्नो नियन्त्रणमा राखिरहेको समाचारमा जनाइएको छ ।

सरकारी सेनाका कर्णेल मालिक डियाको नेतृत्वमा विद्रोह गरिएको भनिएको छ । सैनिक विद्रोहको केहीबेरमै राष्ट्रपतिले टेलिभिजनमार्फत सम्बोधन गर्दै राजिनामा घोषणा गरेका थिए ।

मालीमा सेना र सरकारबिच पछिल्लो समय दुरी बढीरहेको थियो । सैनिकहरुको तलब र अन्य सेवा सुविधा तथा देशमा बढ्दो जिहादी समुहसँग राष्ट्रपतिको सम्बन्धलाई लिएर लगातार टिकाटिप्प्णीहरु भइरहेका थिए । यसैबिच अफ्रिकी राष्ट्रहरुको समुह ‘इकोवास’ले यो घटनालाई सैनिकबाटै गरिएको ‘कु’ को प्रयास भनेको छ ।

टिप्पणी थप्नुहोस्